अंधेरी – मंगळवारी दुपारी अंधेरीतील ७४ वर्षीय महिलेच्या घरी दरोडा टाकण्याचा कट रचल्याप्रकरणी आंबोली पोलिसांनी (Amboli Police Station) हैदराबाद येथील तीन स्वयंपाक्यांना अटक केली. मुख्य आरोपी अजित मुखिया याने कामाच्या पहिल्याच दिवशी दोन वृद्ध महिलांवर क्रूर हल्ला केला आणि नंतर तेथून पळून गेला. घटनेदरम्यान पोलिसांना इतर दोन आरोपी घराबाहेर उभे असल्याचे आढळले.
पीडित महिला शोभा रेखारी आणि बीना भट्ट आहेत, त्या अंधेरी पश्चिमेतील (Andheri west)हिल व्ह्यू सोसायटीमध्ये राहतात. दोन्ही महिला जखमी झाल्या असून त्यांना रुग्णालयात दाखल करण्यात आले आहे. आरोपींचा दरोड्यामागील हेतू आणि घरातून किती मौल्यवान वस्तू चोरीला गेल्या आहेत याचा शोध आंबोली पोलीस घेत आहेत.
पोलिस अधिकाऱ्यांच्या म्हणण्यानुसार, मंगळवारी दुपारी ३.३० वाजता हिल व्ह्यू अपार्टमेंटमध्ये ही घटना घडली. मुखियाला त्या दिवशी स्वयंपाकी म्हणून नवीनच नियुक्त करण्यात आले होते. त्याचा कामाचा पहिला दिवस होता. त्याने दुपारी ३ वाजताच्या सुमारास घरमालकांना जेवण दिले त्यानंतर ते विश्रांतीसाठी गेले. एका पोलिस अधिकाऱ्याने सांगितले की, “सीसीटीव्ही फुटेजवरून या प्रकरणात आणखी दोन आरोपी, विष्णू मुखिया आणि सरोज मुखिया यांचा सहभाग असल्याचे दिसून आले. दोघेही पूर्वी या घरात स्वयंपाकी म्हणून काम करत होते पण त्यांनी नोकरी सोडली होती. त्यांनी दरोड्याची योजना आखली आणि घटनेदरम्यान ते एकमेकांशी कॉन्फरन्स कॉलवर होते.”
अधिकाऱ्याने पुढे सांगितले की, “मंगळवारी दुपारी ३.३० वाजता शोभा यांनी बिना यांचा ओरडण्याचा आवाज ऐकला आणि त्या बिना यांच्याकडे धावत गेल्या. नोकर अजित मुखिया बिनावर लोखंडी दांड्याने हल्ला करत असल्याचे त्यांनी पहिले. शोभा यांनी हस्तक्षेप करण्याचा प्रयत्न केला तेव्हा आरोपींनी त्यांना देखील जखमी केले. त्यानंतर हल्लेखोर ताबडतोब परिसरातून पळून गेले. जखमी अवस्थेत असलेल्या या महिलांनी पोलिसांना बोलावले. पोलिसांनी दोन्ही महिलांना जवळच्या रुग्णालयात उपचारासाठी नेले.”
तपासादरम्यान, पोलिसांना असे आढळून आले की अजित मुखियाने इतर दोघांसोबत दरोड्याची योजना आखली होती. त्या महिला या पूर्वी याच घरात काम करत होत्या. त्यांनी नोकरी सोडली होती. पोलिसांना संशय आहे की दोन्ही वृद्ध महिलांना जखमी केल्यानंतर या तिघांचा संपूर्ण घर लुटण्याचा हेतू होता. घटनेनंतर अजित मुखिया त्याच्या दोन मित्रांसह हैदराबादला पळून गेला. पोलिसांनी सीसीटीव्ही फुटेज आणि मुखियाशी संबंधित कॉल रेकॉर्डच्या आधारे इतर दोन आरोपींचा शोध घेतला आणि त्यांना अटक केली. या गुन्ह्यात आणखी काही लोकांचा सहभाग असल्याचा संशय पोलिसांना आहे.
