अंधेरी: बृहन्मुंबई महानगरपालिकेच्या (बीएमसी) के-पूर्व प्रभागाचे सहाय्यक महानगरपालिका आयुक्त नितीन शुक्ला यांना, लग्नाचे आमिष दाखवून एका महिला वास्तूविशारदवर (आर्किटेक्ट) वारंवार लैंगिक अत्याचार केल्याच्या आरोपाखाली विक्रोळी पार्कसाईट पोलिसांनी सोमवारी अटक केली.
मुंबई मनपा अधिकाऱ्यांनी सांगितले की, शुक्ला यांना तात्काळ सक्तीच्या रजेवर पाठवण्यात आले असून, प्रभागाचा कार्यभार तात्पुरता कार्यकारी अभियंत्यांकडे सोपवण्यात आला आहे. न्यायालयाच्या सुनावणीनंतर त्यांच्या निलंबनाचा निर्णय घेतला जाईल.
पोलिसांच्या माहितीनुसार, तक्रारदार महिला एका खासगी कंपनीत वास्तूविशारद (आर्किटेक्ट) म्हणून कार्यरत आहे. तिची शुक्ला यांच्याशी सुमारे तीन वर्षांपूर्वी व्यावसायिक निमित्ताने पहिली भेट झाली होती.
त्यांची ओळख हळूहळू वैयक्तिक संबंधात बदलली. या दरम्यान शुक्ला यांनी तिला लग्नाचे वचन दिले होते. महिलेने आरोप केला आहे की, त्यांनी या वचनाचा गैरफायदा घेऊन दीर्घ कालावधीसाठी तिच्यावर वारंवार लैंगिक अत्याचार केले.
तक्रारीत पुढे म्हटले आहे की, शुक्ला यांचे गेल्या सात वर्षांपासून लग्न झालेले होते. ही गोष्ट त्यांनी त्यांच्या नात्यादरम्यान पीडितेपासून लपवून ठेवली होती. ही फसवणूक उघडकीस आल्यावर, त्या महिलेने २६ एप्रिल रोजी विक्रोळी पार्कसाईट पोलीस ठाण्यात औपचारिक तक्रार दाखल केली.
वरिष्ठ पोलीस निरीक्षक संतोष घाटेकर यांनी पुष्टी केली की, शुक्ला यांना सोमवारी चौकशीसाठी बोलावण्यात आले होते. पीडितेचा जबाब, प्राथमिक चौकशी आणि सहाय्यक पुराव्यांच्या आधारे, भारतीय न्याय संहिता (बीएनएस) कायद्याच्या संबंधित कलमांनुसार गुन्हा दाखल करण्यात आला. त्यानंतर त्यांना अटक करण्यात आली. त्यांना मंगळवारी न्यायालयात हजर केले जाण्याची शक्यता आहे.
शुक्ला, जे सध्या के-पूर्व प्रभागाचे (अंधेरी पूर्व, जोगेश्वरी पूर्व आणि विले पार्ले पूर्व) सहायक महानगरपालिका आयुक्त म्हणून कार्यरत आहेत. ते यापूर्वी एफ-उत्तर प्रभागातील (सायन, माटुंगा) त्यांच्या कार्यकाळात चर्चेत आले होते. माटुंगा फुलबाजारावरील त्यांच्या कारवाईमुळे स्थानिक रहिवाशांनी तीव्र विरोध दर्शवला होता. या कारवाईमुळे ५० दिवसांच्या आत त्यांची बदली झाली.
के-पूर्व प्रभागात शेवटची बदली होण्यापूर्वी शुक्ला यांची बी वॉर्ड (मस्जिद, पायधुनी) येथे बदली झाली होती.
अधिकाऱ्यांच्या म्हणण्यानुसार, शुक्ला हे सहायक महानगरपालिका आयुक्त म्हणून तीन वर्षांपेक्षा कमी काळापासून सेवेत आहेत. या प्रकरणामुळे पालिका वर्तुळात खळबळ उडाली असून, पार्कसाईट पोलिसांकडून पुढील तपास सुरू आहे.
डिसेंबर २०२५ मध्येही शुक्ला चर्चेत होते. वृत्तानुसार, उद्योगमंत्री उदय सामंत यांनी हिवाळी विधानसभा अधिवेशनात मरोळच्या कोंडीविटा येथील झोपडपट्टीवासियांच्या पुनर्वसनाशी संबंधित घोटाळ्याप्रकरणी शुक्ला आणि त्यांच्या दोन कनिष्ठ अधिकाऱ्यांविरुद्ध चौकशीची घोषणा केली होती.
विधानपरिषद सदस्य अनिल परब यांनी परिषदेत हा मुद्दा उपस्थित केला होता की, शुक्ला आणि त्यांचे सहायक अभियंता भूषण राणे, उप अभियंता विशाल कोकाटे यांनी कोणत्याही योग्य प्रक्रियेचे पालन न करता बिल्डरांना फायदा व्हावा म्हणून झोपडपट्टीवासीयांना त्यांची घरे विकायला लावून त्यांची फसवणूक केली, असे अहवालात म्हटले आहे, हे वृत्त फ्री प्रेस जर्नलने दिले आहे.