अंधेरी- गिरगाव(Girgaon chowpatty), जुहू(Juhu Beach), अक्सा(Aksa Beach), दाना पानी (Dana Pani), गोराई (Gorai Beach) आणि उत्तन (Uttan) या समुद्रकिनाऱ्यांवर गस्त घालण्यासाठी मुंबई पोलीस दलात २१ घोडे सामील झाले आहेत. हे घोडे राजस्थान(Rajasthan), हरियाणा(Haryana), केरळ(Keral) आणि पुणे(Pune) येथून मागवले गेले आहेत. त्यांना उडी मारणे, घोडेस्वारी करणे, धावणे आणि इतर मोहिमांसाठी पूर्णपणे प्रशिक्षित केले आहे.
हे घोडे अंधेरी पूर्व(Andheri East) मधील मरोळ पोलिस कॅम्प(Marol Police Camp) येथे आणण्यात आले आहे. या कॅम्प मध्ये नव्याने बांधलेल्या तबेल्यात त्यांना ठेवण्यात आले आहे. कॅम्प मध्ये चार अतिरिक्त तबेले बांधण्याचे काम सुरू आहे. मुंबई पोलिस लवकरच आणखी घोडे भरती करतील अशी अपेक्षा आहे.
दोन ते पाच वर्षांच्या या घोड्यांची नावे करिश्मा, रणवीर, बाजी, मेघदूत, अर्जुन, सम्राट, अभिमन्यू, सुवर्णरेखा, शिवालिक, विजयज्योती, कृष्णा, पद्मावती, रणधीरा, मंजू, वीर, दास, बिजली, चेतक, तुफान, बादल आणि हिरकणी अशी आहेत.
या तबेल्याचे प्रभारी पोलीस उपनिरीक्षक सागर शिंदे यांनी मिड-डेला सांगितले की, “आमच्याकडे ३६ लहान तबेले आहेत, तसेच स्वच्छतागृहे, पाहुण्यांसाठी खोल्या, पशुवैद्यकीय डॉक्टर, घोड्यांसाठी स्विमिंग पूल आणि वैद्यकीय सुविधा आहेत. घोड्यांसाठी संपूर्ण सुविधा २.९६ एकर जमिनीवर बांधण्यात आली आहे. घोड्यांना प्रशिक्षण देण्यासाठी आणि त्यांची काळजी घेण्यासाठी आमच्याकडे ५० हून अधिक प्रशिक्षित कर्मचारी आहेत.”
“हे घोडे मुंबईच्या समुद्रकिनाऱ्यांवर गस्त घालण्यासाठी तैनात केले जातील. तसेच ज्या दुर्गम भागात वाहने पोहोचू शकत नाहीत अशा ठिकाणी देखील त्यांचा वापर केला जाईल. हे घोडे पोलिस परेड, वर्धापन दिन समारंभ आणि क्रीडा स्पर्धांमध्ये देखील सहभागी होतील. सर्व घोड्यांनी सहा महिन्यांचे प्रशिक्षण घेतले आहे आणि त्यांना चांगले प्रशिक्षण देण्यात आले आहे. त्यांना पूर्णपणे लसीकरण देखील केले आहे,” असे उपनिरीक्षक शिंदे यांनी पुढे सांगितले.
वैद्यकीय आपत्कालीन परिस्थितीसाठी सुसज्ज असलेल्या चार रुग्णवाहिका पशुवैद्यकीय डॉक्टरांसह केंद्रात उपलब्ध आहेत. आपत्कालीन परिस्थितीत, घोड्यांना रुग्णालयात नेण्यासाठी या वाहनांचा वापर केला जातो.
मिड-डे शी बोलताना, मुंबई पोलिसांचे नर्सिंग असिस्टंट हणमंत शिंगटे म्हणाले, “आम्ही या गोठ्यात नियमितपणे घोड्यांची आरोग्य तपासणी आणि लसीकरण करतो. कोणत्याही आजारावर उपचार करण्यासाठी पशुवैद्यकीय डॉक्टर २४ तास उपलब्ध असतात.”
पोलिस आयुक्त आणि सहआयुक्त सत्यनारायण चौधरी (कायदा आणि सुव्यवस्था) आणि सहआयुक्त (प्रशासन) एस. जयकुमार यांच्या मार्गदर्शनाखाली २०२३ मध्ये हा तबेला बांधण्यात आला. उपायुक्त सुनील लोखंडे, उपनिरीक्षक शिंदे यांच्यासह सुविधेतील कामकाजावर देखरेख करत आहेत.