मुंबई: १९९० च्या दशकातील एका हाय-प्रोफाईल ठेव घोटाळ्याशी संबंधित विले पार्ले येथील व्हीआयपी पॅलेस हॉटेल अखेर लिलावासाठी ठेवण्यात आले आहे. जवळपास तीन दशकांपूर्वी जप्त केलेल्या या मालमत्तेची राखीव किंमत ५५.५८ कोटी रुपये निश्चित करण्यात आली आहे.
हा लिलाव महाराष्ट्र ठेवीदार हित संरक्षण (एमपीआयडी) कायद्यांतर्गत सक्षम प्राधिकारी आणि मुंबई पश्चिम उपनगरचे उपविभागीय अधिकारी यांच्या मार्फत आयोजित केला जात आहे. इच्छुक बोलीदारांना ९ जूनपर्यंत राखीव किमतीच्या १०% म्हणजेच ५.५५ कोटी रुपयांची अनामत रक्कम जमा करावी लागणार आहे.
१९९९ मध्ये सी.यू. मार्केटिंगची गुंतवणूक योजना कोसळल्यानंतर ही मालमत्ता जप्त करण्यात आली होती. आर्थिक गुन्हे शाखेने कंपनीचे संचालक उदय एम. आचार्य यांना अटक केली होती. या योजनेतून सुमारे २६,००० गुंतवणूकदारांची ४०० कोटी रुपयांपेक्षा जास्त रकमेची फसवणूक झाल्याचा आरोप होता.
एकेकाळी व्हीआयपी पॅलेस हॉटेल म्हणून ओळखले जाणारे हे हॉटेल आता अस्तित्वात नाही. ज्या रस्त्यावर ते उभे होते, त्या रस्त्याचे नावदेखील बदलून वीर मकरंद घाणेकर रोड झाले आहे.
अधिकाऱ्यांनी स्पष्ट केले की, ही मालमत्ता ‘जशी आहे तशी’ या तत्त्वावर विकली जाणार असून यशस्वी बोलीदाराला थकीत कर, सरकारी देणी आणि इतर दायित्वांचा भारही उचलावा लागेल. अंतिम व्यवहार पूर्ण होण्यापूर्वी लिलाव विक्रीचा अहवाल विशेष एमपीआयडी न्यायालयात सादर केला जाणार आहे.
२०१६ मध्ये आयकर विभागाने या मालमत्तेचा लिलाव करण्याचा प्रयत्न केला होता, मात्र व्यवहार पूर्ण होऊ शकला नाही. यावेळी मात्र या प्रमुख मालमत्तेचे रोखीकरण होऊन गुंतवणूकदारांचे हित साधले जाईल, अशी अपेक्षा व्यक्त केली जात आहे.