मुंबई: अंधेरी पूर्व येथे ओव्हरटेक करणाऱ्या टेम्पोने २१ वर्षीय मोटारसायकलस्वाराला उडवले. सदर मोटारसायकलस्वाराचा मृत्यू झाला. त्याच्या मागे बसलेल्या त्याच्या भावाला किरकोळ दुखापत झाली आहे.
पोलिसांनी दिलेल्या माहितीनुसार, शुक्रवारी संध्याकाळी ६ वाजता साकी नाका(Sakinaka) येथील रहिवासी सागर ज्ञानेश्वर गायकवाड (वय वर्षे २१) आणि त्याचा भाऊ कृष्णा गायकवाड (वय वर्षे २५) हे मोटारसायकलवरून वांद्रे-कुर्ला कॉम्प्लेक्सला(BKC) जात असताना ही घटना घडली. अंधेरी पूर्वेतील(Andheri) हॉटेल आर के रेसिडेन्सी येथे पोहोचले असता उजव्या बाजूने त्यांना ओव्हरटेक करण्याचा प्रयत्न करणाऱ्या एका टेम्पोने त्यांच्या मोटारसायकलला धडक दिली, ज्यामुळे ते दोघेही दुचाकीवरून पडले.
“टेम्पोचे मागचे चाक त्याच्या अंगावर गेल्याने सागर उजव्या बाजूला पडला. त्याच्या डोक्याला आणि छातीला गंभीर दुखापत झाली. त्याचा जागीच मृत्यू झाला. डावीकडे पडलेल्या कृष्णाला किरकोळ दुखापत झाली,” असे एका पोलिस अधिकाऱ्याने सांगितले.
अपघातानंतर टेम्पोचालक पळून गेला, असे कृष्णाने पोलिसांना सांगितले. कृष्णाने त्याच्या भावाला राजावाडी रुग्णालयात नेले, जिथे सागरला मृत घोषित करण्यात आले. त्यानंतर रुग्णालयाने सहार पोलिसांना(Sahar Police Station) माहिती दिली. त्यानंतर अज्ञात टेम्पोचालकाविरुद्ध भारतीय न्याय संहिताच्या संबंधित कलमांखाली निष्काळजीपणा आणि बेदरकारपणे गाडी चालवून मृत्यू घडवून आणल्याबद्दल मोटार वाहन कायद्याच्या तरतुदींसह गुन्हा दाखल करण्यात आला, असे हिंदुस्थान टाइम्सच्या वृत्तात म्हटले आहे.
टीप- बातमी मधील फोटो प्रातिनिधिक आहे.