अंधेरी: अंधेरीतील मरोळमधील चर्च रोडवर सुरू असलेल्या रस्त्याच्या काँक्रिटीकरणामुळे मोठ्या प्रमाणावर धुळीचं प्रदूषण होत असल्याची नागरिकांची तक्रार आहे. या धूळ प्रदूषणाबद्दल रहिवासी आणि सामाजिक कार्यकर्त्यांनी चिंता व्यक्त केली आहे.
या संदर्भात वॉचडॉग फाऊंडेशनने मुंबई महानगरपालिका आणि प्रदूषण प्राधिकरणाकडे तक्रार केली आहे. तक्रारीत, वॉचडॉग फाऊंडेशनने आरोप केला आहे की, कंत्राटदारांनी पाणी फवारणीसारख्या अनिवार्य असणाऱ्या धूळ नियंत्रण उपाययोजना लागू केलेल्या नाहीत.
या संस्थेने इशारा दिला आहे की, अनियंत्रित धुळीमुळे आरोग्याला गंभीर धोका निर्माण होण्याची शक्यता वाढली आहे. विशेषतः लहान मुले, ज्येष्ठ नागरिक आणि श्वसनविकार असलेल्यांसाठी धूळ प्रदूषण गंभीर समस्या बनली आहे. याप्रकरणी संबंधित यंत्रणांनी योग्य ती तपासणी करावी आणि तातडीने कारवाई करावी, अशी मागणी वॉचडॉग फाऊंडेशनने केली आहे, असे फ्री प्रेस जर्नलने वृत्त दिले आहे.