४८ भाविकांनी पूर्ण केला ‘फलटण ते बरड’ पायी प्रवास
मुंबई: मुंबईच्या धकाधकीच्या आणि यांत्रिक जीवनातही आपल्या परंपरेशी नाळ घट्ट जोडून ठेवणारी उदाहरणे आजकाल दुर्मिळ झाली आहेत. मात्र, मुलूंडच्या ‘विठू माऊली’ समूहाने यंदा सलग पाचव्या वर्षी अत्यंत निष्ठेने जोपासलेली वारीची परंपरा खऱ्या अर्थाने कौतुकास्पद ठरली आहे.
यंदाच्या वारीचे सर्वात मोठे वैशिष्ट्य म्हणजे साधेपणा. गर्दीचा कोणताही बडेजाव न करता, मुंबईच्या विविध भागांतून आलेल्या ४८ भाविकांनी एकत्र येत ‘फलटण ते बरड’ या ऐतिहासिक आणि पारंपरिक मार्गावरून आपली पायी वारी पूर्ण केली.
महानगरीय जीवनशैलीत वावरणाऱ्या या ४८ मुंबईकरांनी जुन्या परंपरेचा साधेपणा आणि वारकरी संप्रदायाची मूल्ये अत्यंत सुंदररित्या जपली. ऊन-पावसाचा खेळ सुरू असतानाही आणि वाटेतील अडचणींची तमा न बाळगता, या वारकऱ्यांची पावले न थकता पुढे पडत होती. मुखी ‘ज्ञानबा-तुकाराम’चा अखंड गजर, हातात डौलाने फडकणारी भगवी पताका आणि चेहऱ्यावर विलक्षण उत्साह, असे हे विलोभनीय दृश्य होते.
फलटण ते बरड असा हा आनंददायी पायी प्रवास पूर्ण केल्यानंतर, हा भक्तीचा प्रवाह थेट पंढरीच्या दिशेने रवाना झाला. चंद्रभागेच्या पवित्र तीरावर नतमस्तक होत आणि मंदिरात जाऊन सावळ्या विठ्ठलाचे व रखुमाईचे मनोभावे दर्शन घेत, या भाविकांनी आपल्या वारीची सांगता केली.
शहरीकरणाच्या वेगात हरवत जाणाऱ्या परंपरांच्या काळात, मुलूंडच्या ‘विठू माऊली’ समूहाची ही ५ वी वारी केवळ एक प्रवास उरलेला नाही. आधुनिकतेच्या गराड्यातही भक्ती, श्रद्धा आणि वारकरी संस्कृतीचे संवर्धन करणारी ही एक जिवंत अनुभूती ठरली आहे.