अंधेरीत ‘बनावट आयकर धाडीचा’चा पर्दाफाश

व्यावसायिकाकडून ₹1 कोटी उकळण्याचा प्रयत्न, टोळीतील पाच जणांना अटक

मुंबई : अंधेरी पूर्वेतील चकलाच्या सहार कार्गो इस्टेट परिसरात आयकर विभाग आणि क्राइम ब्रँचचे अधिकारी असल्याचे भासवून एका वैद्यकीय उपकरण व्यावसायिकाच्या कार्यालयावर बनावट छापा टाकणाऱ्या टोळीचा अंधेरी पोलिसांनी पर्दाफाश केला आहे. या टोळीने व्यावसायिकाकडून कथित कर गैरव्यवहार मिटवण्यासाठी ₹1 कोटींची मागणी केल्याचा आरोप आहे. या प्रकरणात पोलिसांनी पाच जणांना अटक केली असून आणखी दोघांची नावे समोर आली आहेत.

ही घटना 17 जुलै 2026 रोजी घडली. राजकुमार कंडासामी (49) हे अंधेरी पूर्वेतील चकाला येथे वैद्यकीय उपकरण कंपनी चालवतात. त्यांच्या कर्मचाऱ्यांनी फोन करून कार्यालयात आयकर विभागाचे अधिकारी आल्याची माहिती दिली. त्यानंतर त्यांना तातडीने कार्यालयात येण्यास सांगण्यात आले.

कंडासामी आणि त्यांची पत्नी घराजवळ उबरची वाट पाहत असताना दोन व्यक्तींनी त्यांच्याशी संपर्क साधला. त्यांनी स्वतःची ओळख आयकर विभागाचे अधिकारी म्हणून करून दिली आणि ओळखपत्रही दाखवले. त्यानंतर दोघांना जबरदस्तीने एका उबरमधून कार्यालयात नेण्यात आल्याचा आरोप आहे.

कार्यालयात पोहोचल्यानंतर टोळीतील सदस्यांनी कंडासामी, त्यांच्या पत्नी तसेच कर्मचाऱ्यांचे मोबाईल फोन ताब्यात घेतले. त्यांच्या हालचालींवर निर्बंध आणत कंपनीची कागदपत्रे तपासण्यात आली. एका आरोपीने कथित सर्च वॉरंट दाखवून कंडासामी यांची स्वाक्षरी घेतली.

त्यानंतर कंपनीतील रोख व्यवहारांबाबत प्रश्न विचारण्यात आले आणि कथित कर गैरव्यवहारासाठी मोठ्या दंडाची भीती दाखवण्यात आली. हे प्रकरण मिटवण्यासाठी ₹1 कोटी द्यावे, अशी मागणी करण्यात आल्याचा आरोप आहे.

आरोपींनी कंडासामी यांनी ₹1.7 लाख रोख रक्कम घेतल्याचा दावा केला आणि त्यावर ₹1.44 कोटींचा दंड होऊ शकतो, अशी धमकी दिल्याचे पोलिस तपासात समोर आले आहे.

मात्र, कंडासामी यांनी पैसे देण्यास नकार देत, जर करासंदर्भात काही गैरप्रकार झाला असेल तर आयकर विभागाने अधिकृत नोटीस द्यावी आणि आपण थेट विभागाकडेच रक्कम भरू, अशी भूमिका घेतली. टोळीला कार्यालयात रोख रक्कम सापडली नाही. सुमारे चार तासांनंतर आरोपी कार्यालयातून निघून गेले.

घटनेनंतर कंडासामी यांनी आपल्या चार्टर्ड अकाउंटंटशी चर्चा केली. त्यांनी आयकर विभागाशी संपर्क साधल्यानंतर अशा प्रकारचा कोणताही अधिकृत छापा टाकण्यात आलेला नसल्याचे स्पष्ट झाले. त्यानंतर कंडासामी यांनी अंधेरी पोलिसांकडे तक्रार दाखल केली.

तक्रार मिळाल्यानंतर अंधेरी पोलिसांनी मोबाईल क्रमांक, कॉल डिटेल रेकॉर्ड (CDR), सेल-आयडी, लोकेशन डेटा तसेच सरकारी आणि खासगी CCTV फुटेजच्या मदतीने तपास सुरू केला. आरोपींच्या हालचालींचा माग काढण्यासाठी अंधेरी, विलेपार्ले, पुणे आणि नालासोपारा येथे पोलिसांची पथके कार्यरत होती.

तपासादरम्यान संतोष उदय खोपटकर (37) आणि विनय रमेश मोरे (37) यांना मुंबईतून ताब्यात घेण्यात आले. त्यानंतर प्रेम किसान सबनानी (50) याचा माग पुण्यातील सिंहगड रोड परिसरात काढण्यात आला. त्याने मोबाईल बंद ठेवला होता; मात्र CDR आणि सेल-आयडीच्या मदतीने पोलिसांनी त्याचा शोध घेतला.

यानंतर प्रज्ञा हरीश माने (27) हिला अंधेरी पूर्वेतून, रेश्मा श्यामराव वारंग (41) हिला नालासोपारा येथून आणि शबिना हाफिज शेख (48) हिला अटक करण्यात आली. जितेंद्र नामदेव मोरे आणि अशोक विठोबा शिंदे यांचीही नावे समोर आली असून ते अन्य एका प्रकरणात आधीपासून न्यायालयीन कोठडीत आहेत.

पोलिसांनी या टोळीच्या व्यापक नेटवर्कचा तपास सुरू केला आहे. बनावट ओळखपत्रे, सरकारी लोगो, रबर स्टॅम्प, लेटरहेड आणि बनावट सर्च वॉरंटशी संबंधित कागदपत्रांचा शोध घेतला जात आहे.

अटक केलेल्या आरोपींचे मोबाईल फोन तपासण्यात येत असून त्यातील कॉल, WhatsApp चॅट्स आणि आर्थिक व्यवहारांची माहिती तपासली जात आहे. या टोळीने याच पद्धतीने आणखी कोणत्या व्यावसायिकांना लक्ष्य केले होते का, याचाही तपास पोलिस करत आहेत, असे मिड-डेच्या वृत्तात म्हटले आहे.

टीप: सदर छायाचित्र एआय निर्मित आहे.