जुहूतील निवासी इमारतीत नाईट वॉचमनचा मृतदेह सापडला पाण्याच्या टाकीत

हत्येचा व्यक्त केला जातोय संशय

मुंबई : जुहू परिसरातील एका निवासी इमारतीत रात्रीच्या ड्युटीवर असलेल्या ४० वर्षीय सुरक्षारक्षकाचा मृतदेह इमारतीच्या भूमिगत पाण्याच्या टाकीत आढळल्याने खळबळ उडाली आहे. या घटनेनंतर जुहू पोलिसांनी हत्येचा गुन्हा नोंदवून तपास सुरू केला आहे.

ही घटना १ ऑगस्टच्या रात्री एन. एस. रोड क्रमांक ११ येथील अभिजीत बिल्डिंगमध्ये घडल्याचे समोर आले आहे. मृत सुरक्षारक्षकाचे नाव मनोज कुमार यादव (वय ४०) असल्याची माहिती पोलिसांनी दिली आहे. रात्रीच्या ड्युटीदरम्यान त्यांच्यासोबत नेमके काय घडले, याचा तपास सध्या सुरू आहे.

दुसऱ्या दिवशी सकाळी मनोज यादव यांचा मृतदेह इमारतीच्या भूमिगत पाण्याच्या टाकीत आढळून आला. त्यांच्या सहकाऱ्याला ही बाब लक्षात आल्यानंतर पोलिसांना माहिती देण्यात आली. घटनेचे गांभीर्य लक्षात घेऊन पोलिसांनी तपासाची चक्रे वेगाने फिरवली.

जुहू पोलिसांनी या प्रकरणी एफआयआर दाखल केला असून हत्येच्या दिशेने तपास सुरू केला आहे. अद्याप कोणत्याही संशयिताची ओळख पटलेली नाही. इमारतीतील तसेच परिसरातील सीसीटीव्ही कॅमेऱ्यांचे फुटेज तपासले जात असून, यादव यांच्या हालचाली आणि त्यांच्या संपर्कात आलेल्या व्यक्तींची माहिती पोलिसांकडून घेतली जात आहे.

दरम्यान, मृतदेहाचे शवविच्छेदन डॉ. आर. एन. कूपर रुग्णालयात करण्यात आले आहे. मात्र, मृत्यूचे नेमके कारण स्पष्ट होण्यासाठी शवविच्छेदनाचा सविस्तर अहवाल मिळणे बाकी आहे. त्यामुळे यादव यांचा मृत्यू नेमका कसा झाला आणि त्यामागे कोणाचा हात आहे, याचा उलगडा तपासानंतरच होणार आहे.

जुहू पोलिसांकडून सीसीटीव्ही फुटेज, घटनास्थळावरील पुरावे आणि शवविच्छेदन अहवालाच्या आधारे पुढील तपास सुरू आहे, असे मिड डे या इंग्रजी वृत्तपत्रात म्हटले आहे.