वाहनचालकांसाठी पर्यायी मार्ग जाहीर
मुंबई : अंधेरी पूर्व आणि मरोळ परिसरातून प्रवास करणाऱ्या वाहनचालकांसाठी महत्त्वाची बातमी आहे. सेव्हन हिल्स जंक्शन ते लोकभारती जंक्शन यांना जोडणारा रस्ता ६ नोव्हेंबर २०२६ पासून ३१ मे २०२७ पर्यंत सर्व प्रकारच्या वाहनांसाठी बंद ठेवण्यात येणार आहे. मुंबई वाहतूक पोलिसांनी यासंदर्भात वाहतूक निर्बंध जाहीर केले आहेत.
या मार्गावर मोठ्या पायाभूत सुविधांची कामे हाती घेण्यात येणार आहेत. यामध्ये रस्त्याचे काँक्रिटीकरण तसेच पावसाळी पाण्याचा निचरा करण्यासाठी नवीन जलनिस्सारण वाहिन्यांचे बांधकाम करण्यात येणार आहे. या कामांमुळे वाहतुकीत अडथळा निर्माण होऊ नये आणि कामे सुरळीतपणे पूर्ण करता यावीत, यासाठी हा मार्ग वाहतुकीसाठी बंद ठेवण्याचा निर्णय घेण्यात आला आहे.
वाहनचालकांनी पर्यायी मार्गांचा वापर करावा
या मार्गावरील वाहतूक बंद राहणार असल्याने अंधेरी पूर्व, मरोळ आणि परिसरातील वाहनचालकांना पर्यायी मार्गांचा वापर करावा लागणार आहे.
सेव्हन हिल्स जंक्शनकडून येणाऱ्या वाहनचालकांना मिलिटरी रोड, तन्वी सुपर मार्केट जंक्शन आणि मरोळ भवनमार्गे पुढील प्रवास करता येणार आहे. वाहनचालकांनी वाहतूक पोलिसांच्या सूचनांचे आणि ठिकठिकाणी लावण्यात आलेल्या दिशादर्शक फलकांचे पालन करावे, असे आवाहन करण्यात आले असल्याचे मिड डे चे वृत्त आहे.
या वाहतूक बदलांमुळे विशेषतः गर्दीच्या वेळेत अंधेरी पूर्व आणि मरोळ परिसरातील वाहतुकीवर परिणाम होण्याची शक्यता आहे. त्यामुळे वाहनचालकांनी घराबाहेर पडण्यापूर्वी पर्यायी मार्गांचे नियोजन करावे आणि प्रवासासाठी अतिरिक्त वेळ राखून ठेवावा.
कधीपर्यंत राहणार वाहतूक बंद?
- सुरुवात: ६ नोव्हेंबर २०२६
- अंतिम मुदत: ३१ मे २०२७
- बंद असलेला मार्ग: सेव्हन हिल्स जंक्शन ते लोकभारती जंक्शन
- बंद असलेली वाहतूक: सर्व प्रकारची वाहने
- बंद ठेवण्याचे कारण: रस्त्याचे काँक्रिटीकरण आणि पावसाळी पाण्याच्या निचऱ्यासाठी जलनिस्सारण वाहिन्यांचे बांधकाम.
अनेक महिने हा मार्ग बंद राहणार असल्याने अंधेरी पूर्व आणि मरोळमधील रहिवासी तसेच नियमित प्रवास करणाऱ्या वाहनचालकांनी या वाहतूक बदलांची नोंद घ्यावी.
टीप: संबंधित छायाचित्र एआय निर्मित आहे.