मुंबई : अनेक विलंबानंतर अखेर जोगेश्वरी टर्मिनस Jogeshwari Terminus प्रकल्पाला वेग आला असून हा महत्त्वाकांक्षी रेल्वे टर्मिनस जानेवारी २०२७ पर्यंत प्रवाशांसाठी खुला होणार असल्याची माहिती पश्चिम रेल्वे प्रशासनाने दिली आहे. मुंबईतील लोकमान्य टिळक टर्मिनसनंतर LTT तब्बल ३४ वर्षांनी उभारला जाणारा हा पहिला स्वतंत्र नवीन रेल्वे टर्मिनस ठरणार आहे.
प्रारंभी या प्रकल्पात तीन प्लॅटफॉर्मची योजना होती. मात्र वाढत्या प्रवासी संख्येचा विचार करून आराखड्यात बदल करण्यात आला. आता टर्मिनसमध्ये चार विस्तीर्ण प्लॅटफॉर्म असतील आणि प्रत्येक प्लॅटफॉर्मची रुंदी ९ मीटरवरून १२ मीटर करण्यात आली आहे. त्यामुळे प्रवाशांची गर्दी नियंत्रित करणे आणि हालचाल अधिक सुलभ करणे शक्य होणार आहे.
जोगेश्वरी टर्मिनस पूर्ण क्षमतेने कार्यान्वित झाल्यानंतर २४ डब्यांच्या मेल आणि एक्स्प्रेस गाड्यांच्या १२ जोड्या दररोज हाताळण्याची क्षमता त्याच्याकडे असेल. याशिवाय वंदे भारत गाड्यांसाठी स्वतंत्र कोचिंग डेपोची सुविधाही येथे विकसित करण्यात येत आहे.
या टर्मिनसमुळे सध्या प्रचंड ताण सहन करणारे बोरिवली Borivli, अंधेरी Andheri, वांद्रे टर्मिनस Bandra Terminus, दादर Dadar आणि मुंबई सेंट्रल Mumbai Central यांसारख्या स्थानकांवरील गर्दी मोठ्या प्रमाणात कमी होण्याची अपेक्षा आहे. दीर्घ पल्ल्याच्या अनेक गाड्या येथून सुरू किंवा समाप्त केल्या जाण्याची शक्यता आहे.
वाहतूक सुलभतेच्या दृष्टीने जोगेश्वरी टर्मिनसचे स्थान अत्यंत महत्त्वाचे मानले जात आहे. राम मंदिर रेल्वे स्थानकाच्या जवळ असलेल्या या टर्मिनसला मेट्रो लाईन-७ची जोडणी मिळणार आहे. तसेच प्रवाशांसाठी टॅक्सी, अॅप-आधारित कॅब, रिक्षा आणि मोठ्या पार्किंग सुविधांची व्यवस्था करण्यात येणार आहे. यामुळे रेल्वे, मेट्रो आणि रस्ते वाहतूक यांच्यात प्रभावी मल्टी-मोडल कनेक्टिव्हिटी निर्माण होईल.
रेल्वे प्रवासी संघटनांकडून या प्रकल्पाची कामे जलदगतीने पूर्ण करण्याची मागणी सातत्याने होत होती. सध्या प्रकल्पाचे मोठ्या प्रमाणावर काम पूर्ण झाले असून पश्चिम रेल्वेने जानेवारी २०२७ हे नवीन लक्ष्य निश्चित केले आहे.
मुंबईच्या वाढत्या लोकसंख्येला आणि रेल्वे प्रवाशांच्या गरजांना लक्षात घेता जोगेश्वरी टर्मिनस हा शहराच्या वाहतूक व्यवस्थेतील एक महत्त्वाचा टप्पा मानला जात असून, भविष्यात पश्चिम उपनगरांसाठी हा एक प्रमुख रेल्वे केंद्रबिंदू ठरणार आहे, असे हिंदुस्थान टाईम्सच्या वृत्तात म्हटले आहे.