पर्यायी मार्गांची माहिती जाहीर
अंधेरी पूर्व : अंधेरी पूर्वेकडील विजयनगर पुलाखालील रस्ता येत्या १७ नोव्हेंबर २०२६ पासून ३१ मे २०२७ पर्यंत सर्व प्रकारच्या वाहनांसाठी बंद ठेवण्यात येणार आहे. भूमिगत २,४०० मिमी व्यासाची जलवाहिनी तानसा मुख्य जलवाहिनीला जोडण्याच्या कामासाठी हा निर्णय घेण्यात आला आहे. त्यामुळे एमआयडीसी, सीप्झ आणि आरे कॉलनी परिसरातील वाहनचालकांना पुढील सहा महिन्यांहून अधिक काळ वाहतूक बदलांचा सामना करावा लागणार आहे.
नेमके कोणते काम होणार?
एमआयडीसी वाहतूक विभागाच्या हद्दीत विजयनगर पुलाखालील परिसरात भूमिगत २,४०० मिमी व्यासाची जलवाहिनी तानसा मुख्य जलवाहिनीला जोडण्याचे काम करण्यात येणार आहे.
हे काम एमआयडीसी सीप्झ आणि आरे कॉलनी यांना जोडणाऱ्या रस्त्यावर तसेच आरे कॉलनीकडून अंधेरी पूर्वेतील एमआयडीसीच्या दिशेने जाणाऱ्या मार्गावर केले जाणार आहे.
या कामाच्या पार्श्वभूमीवर एमआयडीसी सीप्झ कंपनीकडून विजयनगर पुलाखालील संबंधित रस्त्यावर होणारी सर्व प्रकारची वाहनांची वाहतूक तात्पुरती बंद करण्यात येणार आहे.
वाहनचालकांसाठी पर्यायी मार्ग कोणते?
वाहतूक कोंडी टाळण्यासाठी वाहतूक पोलिसांकडून पर्यायी मार्ग निश्चित करण्यात आले आहेत.
- एमआयडीसी सीप्झकडून येणारी वाहने : संबंधित बंद रस्त्याऐवजी विजयनगर पूल आणि विजयनगर जंक्शनमार्गे पुढील इच्छित स्थळी जाता येईल.
- आरे कॉलनीकडून येणारी वाहने : वाहनचालकांना मरोळ रोडमार्गे विजयनगर जंक्शन येथे पोहोचून पुढील इच्छित स्थळी जाता येईल.
३१ मे २०२७ पर्यंत वाहतूक निर्बंध
हे वाहतूक निर्बंध १७ नोव्हेंबर २०२६ ते ३१ मे २०२७ या कालावधीत लागू राहणार आहेत. या कालावधीत वाहनचालकांनी जाहीर केलेल्या पर्यायी मार्गांचा वापर करावा आणि वाहतूक पोलिसांना सहकार्य करावे, असे आवाहन करण्यात आले आहे, असे फ्री प्रेस जर्नलच्या वृत्तात म्हटले आहे.
