मुंबई: बृहन्मुंबई महानगरपालिकेचे (BMC) के-उत्तरचे K North ward officer कार्यरत सहाय्यक आयुक्त महेश सुभाष पाटील यांना पोलिसांनी ‘फरार आरोपी’ घोषित केल्यानंतर निलंबित करण्यात आले आहे. ते सध्या फरार आहेत. एका बनावट पुनर्विकास गुंतवणूक योजनेद्वारे अभिनेते जावेद जाफरी Javed Jaffery यांच्या कुटुंबीयांची १६.२४ कोटी रुपयांची फसवणूक करण्यास मदत केल्याचा त्यांच्यावर आरोप आहे.
हे प्रकरण एका कथित गुंतवणूक घोटाळ्याशी Investment Scam संबंधित आहे. अभिनेता जावेद जाफरी यांच्या पत्नी हबीबा जाफरी यांनी पाटील आणि व्यावसायिक निशित पटेल यांच्यावर बनावट सरकारी कागदपत्रे आणि उच्च परताव्याची खोटी आश्वासने देऊन कुटुंबाला वांद्रे पुनर्विकास प्रकल्पात Bandra SRA Project गुंतवणूक करण्यास प्रवृत्त केल्याचा आरोप केला आहे.
निलंबनाच्या आदेशानुसार, गुन्हे शाखेने Crime Branch मुंबई महापालिकेला कळवले आहे की, के-उत्तर वॉर्डमध्ये कार्यरत असलेले पाटील हे फरार आरोपी असून त्यांचा शोध सुरू आहे. २७ मे रोजी पालिका प्रशासनाने केलेल्या सद्यस्थितीच्या चौकशीनंतर, पोलिसांनी २९ मे रोजी महापालिकेला कळवले की तपास सुरू असून पाटील अद्याप बेपत्ता आहेत.
या प्रकरणात पोलिसांनी निशित पटेलला आधीच अटक केली आहे. त्याला न्यायालयात हजर करण्यात आले आणि पोलीस कोठडी सुनावण्यात आली.
तक्रारीनुसार, हबीबा जाफरी यांचा पाटील यांच्याशी पहिला संपर्क एप्रिल २०२४ मध्ये झाला, जेव्हा त्यांना त्यांच्या अंधेरी Andheri येथील बंगल्यासाठी मालमत्ता कराची नोटीस मिळाली. त्यावेळी सहायक आयुक्त म्हणून कार्यरत असलेल्या पाटील यांनी कथितरित्या हे प्रकरण सोडवण्यासाठी मदत करण्याची तयारी दर्शवली आणि त्यांना वांद्रे येथील ‘न्यू कमलकुंज’ नावाच्या प्रस्तावित व्यावसायिक पुनर्विकास प्रकल्पातील गुंतवणुकीची माहिती दिली.
तक्रारीत असा आरोप आहे की, पाटील यांनी व्यावसायिक निशित पटेल यांच्यासोबत भेटीगाठी घडवून आणल्या. पटेल यांनी मोठ्या विकासकांशी संबंध असल्याचा दावा केला आणि या प्रकल्पात जवळपास १५० कोटी रुपयांची गुंतवणूक आधीच झाल्याचे सांगितले. कुटुंबाचा विश्वास संपादन करण्यासाठी, आरोपीने कथितरित्या बनावट सरकारी कागदपत्रे, नकाशे आणि भाडेपट्ट्यापूर्वीचे करार सादर केले.
पोलिसांनी सांगितले की, आरोपींनी अधिकृत प्रक्रियेच्या नावाखाली कुटुंबाच्या निवासस्थानी बनावट नोंदणी प्रक्रिया राबवली, ज्यात फोटो, बोटांचे ठसे आणि सह्या गोळा करण्याचाही समावेश होता. हा प्रकल्प खरा आहे असे मानून, जाफरी कुटुंबाने मालमत्ता विकून मोठी रक्कम गुंतवली, आणि हा निधी अनेक संस्थांमार्फत वळवण्यात आला.
या कथित फसवणुकीचा अंदाज १६.२४ कोटी रुपये असून, त्यात चेक, रोख रक्कम, विदेशी चलन आणि चैनीच्या वस्तूंच्या माध्यमातून केलेल्या देयकांचा समावेश आहे.
याच पुनर्विकास प्रकल्पाशी संबंधित आरोपांवरून पाटील यांना यापूर्वी नोव्हेंबर २०२५ मध्ये एका महिन्याच्या सक्तीच्या रजेवर पाठवण्यात आले होते. त्यावेळी त्यांनी हे आरोप फेटाळले होते.