मुंबई: तब्बल २२ वर्षांपासून पोलिसांना गुंगारा देणाऱ्या एका फरार आरोपीला अखेर मुंबई पोलिसांनी अटक करण्यात यश मिळवले आहे. राजेंद्र शिंदे (वय ४९) असे अटक करण्यात आलेल्या आरोपीचे नाव असून तो अनैतिक मानवी वाहतूक प्रतिबंधक कायदा (Prevention of Immoral Traffic Act – PITA) अंतर्गत दाखल गुन्ह्यात फरार होता.
पोलिसांनी दिलेल्या माहितीनुसार, शिंदेविरोधात २२ वर्षांपूर्वी ओशिवरा पोलिस ठाण्याच्या Oshiwara Police Station हद्दीत गुन्हा दाखल करण्यात आला होता. या प्रकरणात तो न्यायालयीन प्रक्रियेदरम्यान फरार झाला होता. त्याचा शोध घेण्यासाठी अनेक वर्षे प्रयत्न करण्यात आले, मात्र तो सतत ठिकाणे बदलत असल्याने पोलिसांना यश येत नव्हते.
दरम्यान, सत्र न्यायालयाने आरोपीविरोधात अजामीनपात्र अटक वॉरंट जारी करून त्याला तातडीने अटक करण्याचे निर्देश दिले. त्यानंतर मुंबई पोलिसांच्या Mumbai Police विशेष पथकाने गुप्त माहितीदारांच्या मदतीने तपासाची चक्रे फिरवली. तपासादरम्यान शिंदेने २००५ मध्ये आपली खोली विकल्याचे आणि २०१२-१३ च्या सुमारास पुनर्विकासासाठी हटविण्यात आलेल्या झोपडपट्टीतून दुसऱ्या ठिकाणी स्थलांतर केल्याचे समोर आले. त्यामुळे त्याचा माग काढणे अधिक कठीण झाले होते.
विशेष पथकाला मिळालेल्या माहितीनुसार आरोपी विलेपार्ले Vileparle परिसरात वास्तव्यास असल्याचा संशय होता. त्यानुसार पोलिसांनी परिसरात पाळत ठेवली. संशयास्पद हालचाली करणाऱ्या एका व्यक्तीची चौकशी केल्यानंतर त्याची ओळख राजेंद्र शिंदे अशी पटली आणि त्याला तात्काळ ताब्यात घेण्यात आले. विशेष म्हणजे, ज्या ओशिवरा Oshiwara परिसरात गुन्हा नोंदवण्यात आला होता, त्यापासून अवघ्या ९ किलोमीटर अंतरावर असलेल्या विलेपार्लेमध्ये तो राहत असल्याचे उघड झाले.
या कारवाईमुळे तब्बल दोन दशकांहून अधिक काळ फरार असलेल्या आरोपीला न्यायालयासमोर उभे करण्याचा मार्ग मोकळा झाला असून, पुढील कायदेशीर प्रक्रिया सुरू करण्यात आली आहे.