अंधेरीतील हॉटेलमध्ये महिलेचा संशयास्पद मृत्यू

शवविच्छेदन अहवालाकडे पोलिसांचे लक्ष

मुंबई: अंधेरी पूर्व येथील एका हॉटेलमध्ये ३० वर्षीय महिलेचा संशयास्पद परिस्थितीत मृत्यू झाल्याची घटना समोर आली असून, या प्रकरणाचा तपास मुंबई पोलिसांनी सुरू केला आहे. प्राथमिक माहितीनुसार, ही घटना अपघाती मृत्यू (Accidental Death Report – ADR) म्हणून नोंदविण्यात आली असली, तरी मृत्यूचे नेमके कारण शवविच्छेदन अहवालानंतरच स्पष्ट होणार आहे.

मृत महिलेची ओळख पूजा पगडेल (वय ३०) अशी झाली आहे. शनिवारी मध्यरात्रीनंतर सुमारे १.३० वाजता ती बी. एम. बिष्ट (वय ५१) यांच्यासोबत अंधेरी पूर्वेतील एका हॉटेलमध्ये दाखल झाली होती. पोलिसांनी बिष्ट यांना चौकशीसाठी ताब्यात घेतले असून त्यांचा जबाब नोंदविण्यात आला आहे.

पोलिसांच्या प्राथमिक तपासानुसार, रविवारी पहाटे सुमारे ४.३० वाजण्याच्या सुमारास पूजाला रक्ताची उलटी झाली आणि ती बेशुद्ध पडली. त्यानंतर तिला शुद्ध आली नाही. याच दरम्यान बिष्ट हे त्यांच्या पायावरील गँगरीनच्या उपचारासाठी रुग्णालयात गेले होते. हॉटेल कर्मचाऱ्यांना त्यांनी महिलेची प्रकृती बिघडल्याची माहिती दिल्याचेही पोलिसांनी सांगितले आहे.

रविवारी सायंकाळी हॉटेलमधील रूम सर्व्हिस कर्मचाऱ्यांना पूजा पगडेल बेशुद्ध अवस्थेत आढळून आली. त्यांनी तत्काळ हॉटेल व्यवस्थापनाला माहिती दिली. त्यानंतर पोलिसांना पाचारण करण्यात आले. घटनास्थळी बोलावण्यात आलेल्या डॉक्टरांनी सायंकाळी सुमारे ५.१५ वाजता तपासणी करून पूजाला मृत घोषित केले.

पोलिसांनी मृतदेह ताब्यात घेऊन कूपर रुग्णालयात शवविच्छेदनासाठी पाठविला आहे. प्राथमिक माहितीनुसार, मद्यपानानंतर रक्ताची उलटी झाल्याने तिचा मृत्यू झाला असावा, असा अंदाज व्यक्त करण्यात येत आहे. मात्र, पोलिसांनी कोणतेही निश्चित कारण सांगण्यास नकार दिला असून शवविच्छेदन अहवाल आल्यानंतरच मृत्यूचे नेमके कारण स्पष्ट होईल, असे अधिकाऱ्यांनी सांगितले.

अंधेरी पोलिसांनी या प्रकरणी अपघाती मृत्यूची नोंद (ADR) केली असून, मृत्यूपूर्वी घडलेल्या घटनाक्रमाचा, हॉटेलमधील सीसीटीव्ही फुटेजचा तसेच उपस्थित व्यक्तींच्या जबाबांचा तपास सुरू आहे. सध्या कोणताही निष्कर्ष काढण्यात आलेला नसून, तपास पूर्ण होईपर्यंत सर्व शक्यतांचा विचार केला जात असल्याचे पोलिसांनी स्पष्ट केले आहे.